माझी वाङ्मयशेती: July 2018

कविता * गझल * देशभक्तीगीत * नागपुरी तडका * लावणी * अंगाईगीत * शेतकरीगीत * ललीत लेख * कथा * विडंबन * हादग्याची गाणी * जात्यावरची गाणी * पोळ्याच्या झडत्या * भक्तीगीत * अभंग * महादेवाची गाणी * नाट्यगीत * गौळण * पारंपारिक गाणी * भजन * भावगीत * विनोदी गीत *भुलाबाईची गाणी *तुंबडीगीत * बडबडगीत * बालकविता * विनोदी * आणि आणखी बरेच काही......

वंदे मातरम्‌....!

गगनावरी तिरंगा ....!!

(वृत्त-आनंदकंद)

गगनावरी तिरंग्या फ़डकत असेच जावे
ओलांडुनी नकाशे तू ब्रह्मस्थान घ्यावे ....!!

तू प्राण भारताचा, शक्ती ध्वजा-पताका
संगे हिमालयाला येण्यास मार हाका
समवेत घे सह्याद्री, मेरूस ये म्हणावे
ओलांडुनी नकाशे तू ब्रह्मस्थान घ्यावे ....!!

साथीस ब्रह्मपुत्रा, गोदावरी नि यमुना
धारा तरंग स्फ़ूर्ती, देईल पावलांना
कन्या भगीरथाची, रस्ते तिला पुसावे
ओलांडुनी नकाशे तू ब्रह्मस्थान घ्यावे ....!!

तारांगणे उद्याची, कक्षा तुझी असावी
ही मान भारताची, सर्वत्र उंच व्हावी
आता अभय मनाच्या धुंदीस या जपावे
ओलांडुनी नकाशे तू ब्रह्मस्थान घ्यावे ....!!

- गंगाधर मुटे 'अभय’

...................................................

अभिप्राय लिहा

...................................................

माय मराठीचे श्लोक...!!

माय मराठीचे श्लोक...!!

(वृत्त – भुजंगप्रयात)

नमो मायभाषा! जयोस्तुss मराठी!

तुझे शब्द सान्निध्य माझे ललाटी

जडो ध्यास हा छंद व्यासंग बोली

घडो हे समस्ता! नमो मायबोली..!!

तुझे शब्दलालित्य सूरास मोही

तसा नादब्रह्मांस आनंद होई

सुरांच्या नभी सूरगंगा नहाली

घडो हे समस्ता! नमो मायबोली..!!

जरी वेगळी बोलती बोलभाषा

अनेकांत एकत्व ही प्राणभाषा

असे भाग्य आम्हां मराठी मिळाली

घडो हे समस्ता! नमो मायबोली..!!

असा मावळा गर्जला तो रणाला

तसा घोष "हर हर महादेव" झाला

मराठी तुतारी मराठी मशाली

घडो हे समस्ता! नमो मायबोली..!!

अभय एक निश्चय मनासी करावा

ध्वजा जीव ओवाळुनी फ़डकवावा

सदा शब्द वाणीत ये सर्वकाली

घडो हे समस्ता! नमो मायबोली..!!

गंगाधर मुटे

..............................................

अभिप्राय लिहा

..............................................

सुंदर ते ध्यान….!!

बळीराजाचे ध्यान ....!!

सुंदर ते ध्यान उभे बांधावरी

नांगर खांद्यावरी घेवोनिया..॥१॥

कासे पितांबर ते फ़ाटके धोतर

टायरचे खेटर पायामधी..॥२॥

तुळशीहार जणू घामाचीच धार

उन्हाला आधार पगडीचा..॥३॥

कवच-कुंडले छातीच्या बरगड्या

पोटीच्या आतड्या नृत्य करी..॥४॥

नैवेद्य-प्रसाद कांदा भाकरीचा

चेंदा मिरचीचा तोंडी लावी..॥५॥

आरतीला नाही त्याची रखुमाई

चारतसे गाई माळरानी..॥६॥

राजा शेतकरी बळीराज यावे

संघटित व्हावे अभयाने..॥७॥

गंगाधर मुटे

..............................................
प्रतिक्रिया लिहा
..............................................

सजणीचे रूप …!!

सजणीचे रूप ...!!

रुपये पाहता लोचनी।

सुखी झाली ती साजणी ॥१॥

म्हणे व्यापारी बरवा।

म्हणे पगारी बरवा ॥२॥

शेती बागा त्याचे घरी।

परी नको शेतकरी ॥३॥

ऐसे सजणीचे रूप।

पदोपदी दिसे खूप ॥४॥

अभय म्हणे कास्तकारा।

डोहामधी डुबक्या मारा ॥५॥

गंगाधर मुटे

............**........... **............

हक्कदार लाल किल्ल्याचे…!

हक्कदार लाल किल्ल्याचे…!

या देशाचे पालक आम्ही
सच्चे कास्तकार रे
लालकिल्ल्याच्या सिंहासनाचे
आम्हीबी हकदार रे ...........||धृ||

लढले बापू-लाल-बाल ते
सुराज्याच्या जोषाने
क्रांतीकारी शहीद झाले
रक्त सांडुनी त्वेषाने
स्वातंत्र्याचा लढा रंगला
चेतुनी अंगार रे
लालकिल्ल्याच्या सिंहासनाचे
आम्हीबी हकदार रे ...........||१||

विदेशींनी हक्क सोडता,
केला ताबा देशींनी
केवळ खुर्ची बदलून केले,
वेषांतर दरवेशींनी
परवशतेच्या बेड्या आम्हा,
कितीदा छळणार रे
लालकिल्ल्याच्या सिंहासनाचे,
आम्हीबी हकदार रे ...........||२||

शेतकर्‍यांच्या,कामकर्‍यांच्या,
पोशिंद्याच्या पोरा ये
फ़ुंकून दे तू बिगुल आता,
नव्या युगाचा होरा घे
भारतभूचे छावे आम्ही,
अभयाने झुंजणार रे
लालकिल्ल्याच्या सिंहासनाचे,
आम्हीबी हकदार रे ...........||३||

गंगाधर मुटे
....*......*......*.......*.......*.........
या गीतावर

प्रतिक्रिया लिहा.

.......................................

बळीराजा डॉट कॉम

सस्नेह निमंत्रण

एक नवे संकेतस्थळ

बळीराजा डॉट कॉम

www.baliraja.com

आपण येथे वाचू शकता,

मराठीत लिहू शकता,

प्रतिसाद देऊ शकता,

लेख लिहू शकता,

काव्य लिहू शकता,

चर्चेत भाग घेऊ शकता,

नवीन चर्चा सुरू करू शकता

या, एक वेळ अवश्य भेट द्या.

सदस्य व्हा.....!

गंगाधर मुटे, निमंत्रक

* * *

या मित्रांनो,

काळ्याआईच्या कष्टकर्‍यांनो,
उपेक्षितांच्या सहकार्‍यांनो,
हक्कासाठी लढणार्‍यांनो,
लोकशाहीच्या पहारेकर्‍यांनो,
स्वप्नं उद्याचे बघणार्‍यांनो,
नव्या युगाच्या निर्मात्यांनो,
या जरासे खरडू काही,
काळ्याआईविषयी बोलू काही.
* * * * * *

http://www.baliraja.com

.......................................................

Ringtone Download

Ringtone Download

माय मराठीचे श्लोक - रिंगटोन डाउनलोड करा.

वेळ : ३२ सेकंद - MP3 आकार - 1.22 MB

माय मराठीचे श्लोक - रिंगटोन ऐका.

संपूर्ण मायमराठीचे श्लोक ऐकण्यासाठी येथे क्लिक करा.

----------------------------------------

नमस्कार

नमस्कार मित्रहो,

ही माझी छोटीसी दुनिया...

माझ्या छोट्याशा दुनियेत आपले

मन:पुर्वक स्वागत..

येथे आपणास मिळेल......

माझ्या काही गद्य आणि पद्य रचना..

उभे-आडवे आयुष्य जगतांना

खाल्लेल्या खस्तांचे प्रतिबिंब...आणि

शेतकरी म्हणुन जगतांना (?)

आलेले काही अनुभव...

आपणास आवडले तरी

आणि ना-आवडले तरीही

प्रतिक्रिया अवश्य द्या...

.

गंगाधर मुटे

आर्वी छोटी,हिंगणघाट जि.वर्धा.

E-Mail : ranmewa@gmail.com

------------------------------